სტრასბურგს ხშირად”შობის დედაქალაქს“ უწოდებენ. საშობაო პერიოდში ქალაქის ისტორიულ ქუჩებსა და მოედნებს განათებები ამშვენებს, ხის პატარა ჯიხურებში სადღესასწაულო ნივთები და ადგილობრივი პროდუქტები იყიდება, ქალაქის იერს კი განსაკუთრებულ ხიბლს ალზასური არქიტექტურა სძენს. ამ ყველაფერს ემატება ქალაქის მთავარი ნაძვის ხე, რომელიც საშობაო გარემოს კიდევ უფრო შთამბეჭდავს ხდის.

თუ თქვენთვის საშობაო მოგზაურობის მთავარი ნაწილი სადღესასწაულო ატმოსფერო, ულამაზესი დეკორაციები და ძველი ევროპული ქალაქის ხიბლია, სტრასბურგი ნამდვილად ღირსეულ ადგილს დაიკავებს თქვენს სამოგზაურო სიაში.

ვენაში, Rathausplatz-ის მოედანზე, საშობაო ბაზრობას სადღესასწაულო განათებებით მორთული პარკი და Vienna Ice World ემატება. აქ სტუმრებს ყინულზე სრიალის შესაძლებლობა აქვთ, ბავშვებისთვის კი მოწყობილია სპეციალური გასართობი სივრცეები, კარუსელები და საბავშვო ყინულის მოედანი. ეს ვენას განსაკუთრებით მიმზიდველ მიმართულებად აქცევს ოჯახური საშობაო მოგზაურობისთვის.

ვენაში ასევე შეგიძლიათ მოინახულოთ: Schönbrunn Palace (6 ნოემბ.–6 იანვ.), Spittelberg, Freyung, Karlsplatz.

იოლნის ერთ-ერთი ყველაზე ცნობილი საშობაო ბაზრობა შთამბეჭდავი კიოლნის საკათედრო ტაძრის ფონზე იმართება. სწორედ ეს მდებარეობა ქმნის მის განსაკუთრებულ იერს და ბაზრობას ქალაქის ერთ-ერთ მთავარ საშობაო ღირსშესანიშნაობად აქცევს. თუმცა, კიოლნში მხოლოდ ერთი ბაზრობა არ დაგხვდებათ — სხვადასხვა მოედანზე მოწყობილი საშობაო ბაზრობები საშუალებას გაძლევთ, ქალაქი უფრო მრავალფეროვანი კუთხით აღმოაჩინოთ.

ნიურნბერგი კლასიკური გერმანული შობის ატმოსფეროს გასაცნობად იდეალური არჩევანია. მისი ისტორიული საშობაო ბაზრობა საუკუნოვან ტრადიციას აერთიანებს, სადაც დაახლოებით 180 წითელ-თეთრი ჯიხური ტრადიციულ დეკორაციებს, ხელნაკეთ ნივთებსა და ადგილობრივ ტკბილეულს გთავაზობთ.

პრაღაში შობა ზღაპრულ გარემოში გატარებულ დღესასწაულს ჰგავს. ძველი ქალაქის მოედანი, გოთიკური ეკლესიები, ასტრონომიული საათი და სადღესასწაულო განათებები ქალაქს განსაკუთრებულ ხიბლს სძენს. საშობაო ბაზრობა ვაცლავის მოედანზეც იმართება და 28 ნოემბრიდან 6 იანვრამდე გაგრძელდება.

კრაკოვის საშობაო ბაზრობა ევროპის ერთ-ერთ ულამაზეს ისტორიულ მოედანზე იმართება. Sukiennice, წმინდა მარიამის ბაზილიკა და განათებული ძველი ქალაქი განსაკუთრებულ სადღესასწაულო ატმოსფეროს ქმნის.

ვროცლავის საშობაო ბაზრობა ფერად ისტორიულ შენობებს, განათებულ ქუჩებსა და ხის პატარა სახლებს აერთიანებს. ქალაქის ცნობილი ჯუჯების ქანდაკებები კი მის აღმოჩენას განსაკუთრებით სახალისოს ხდის, მათ შორის ბავშვებისთვისაც.

გდანსკი განსხვავებული არჩევანია მათთვის, ვისაც საშობაო ბაზრობასთან ერთად ზღვისპირა ქალაქის აღმოჩენაც სურს. სადღესასწაულო დეკორაციებს აქ ბალტიის ზღვისპირა ქალაქისთვის დამახასიათებელი ჰანზური არქიტექტურა ემატება.

Winter Wonders ბრიუსელში საშობაო დღესასწაული ქალაქის სხვადასხვა ნაწილშია გადანაწილებული. განათებები, ყინულის მოედანი, მრავალფეროვანი საკვები და გასართობი ღონისძიებები ქალაქს დიდ სადღესასწაულო სივრცედ აქცევს.

ბუდაპეშტში საშობაო მოგზაურობა ქალაქის ცნობილი თერმული აბანოებითაც შეგიძლიათ გაამდიდროთ. დღისით დაათვალიერეთ ქალაქი და დაისვენეთ აბანოებში, საღამოს კი ეწვიეთ საშობაო ბაზრობებს Vörösmarty Square-სა და წმინდა სტეფანეს ბაზილიკასთან.