ვროცლავი-ველოსიპედების ქალაქი

• ველობილიკების სიგრძე: 200+ კმ მარკირებული მარშრუტი
• საუკეთესო სეზონი: აპრილი-ოქტომბერი
• სირთულე: ყველა დონის ველოსიპედისტისთვის შესაფერისი

ვროცლავი პოლონეთის ერთ-ერთი თანამედროვე და სიცოცხლით სავსე ქალაქია, რომელიც თავისი უნიკალური ისტორიული არქიტექტურითა და მრავალფეროვანი კულტურით იზიდავს სტუმრებს. თუმცა, ვროცლავის განსაკუთრებულობას ისიც განაპირობებს, რომ ველოსიპედი აქ ცხოვრების განუყოფელი ნაწილია. ქალაქში ველოსიპედით გადაადგილება არა მხოლოდ სწრაფი და კომფორტულია, არამედ ეკოლოგიურად სუფთა და სასიამოვნოც.

ქალაქის ველო ინფრასტრუქტურა იმდენად განვითარებულია, რომ აქ ველოსიპედით გადაადგილება ყოველდღიურობის ბუნებრივი ნაწილია. ასობით კილომეტრიანი ველობილიკი ერთმანეთთან აკავშირებს ქალაქის ცენტრს, პარკებსა და გარეუბნებს. გზად იხილავთ ოდერის სანაპიროს,ხიდებს, ტყეებსა და მინდვრებს, სადაც მარტივად შეგიძლიათ გაერიდოთ ქალაქის ხმაურს და დაისვენოთ.

ვროცლავში ველოსიპედის ქირაობა უმარტივესია – საკმარისია ისარგებლოთ Nextbike City-ის ავტომატური სადგურებით.
რეგისტრაციისთვის გადმოწერეთ აპლიკაცია ან დარეგისტრირდით ვებსაიტზე
Wrocławski Rower Miejski

ველოაქტივობები ვროცლავში მრავალფეროვანია: შეგიძლიათ მშვიდად გაისეირნოთ ისტორიულ უბნებში და თან მოინახულოთ მნიშვნელოვანი კულტურული ადგილები, აირჩიოთ სპორტული მარშრუტი ტყეებისა და მდინარეების გასწვრივ ან დატკბეთ ოჯახური გასეირნებით პარკებში.

მარშრუტი დამწყებთათვის: Route DOT290
სიგრძე: 15 კმ | დრო: 1.5-2 საათი | სირთულე: მარტივი
მარშრუტი Wolności Square-დან იწყება და ქალაქის ცნობილ ღირსშესანიშნაობებს მოიცავს:

• Hydropolis – ინტერაქტიული წყლის მუზეუმი
• Centennial Hall – UNESCO-ს მსოფლიო მემკვიდრეობა
• იაპონური ბაღი – მშვიდი ოაზისი ქალაქში
• Rynek – ქალაქის გული და ცენტრალური მოედანი

მარშრუტი გამოცდილთათვის: Odra Trail DOT72
სიგრძე: 53 კმ | დრო: 3.5-4 საათი | სირთულე: საშუალო
53-კილომეტრიანი მარშრუტი, რომელიც აერთიანებს ქალაქის ცენტრს, ტყეებსა და მდინარის სანაპიროებს. იდეალურია მთელი დღის თავგადასავლისთვის.
განსაკუთრებული ადგილები

• Ostrów Tumski – ვროცლავის უძველესი უბანი, საღამოობით განათებული გაზის ლამპებით
• Opatowicka Island – მშვიდი და მწვანე კუნძული, სადაც ქალაქის ხმაური სრულიად ქრება
• Szczytnicki Park – ქალაქის უდიდესი პარკი, იდეალური ოჯახური პიკნიკისთვის

ველოსიპედით სიარული აქ ცხოვრების სტილია. ქალაქი ქმნის ატმოსფეროს, სადაც მოძრაობა და გარემოს სიყვარული ერთიანდება.

საინტერესოა, რომ პოლონეთში ველოსიპედის კულტურა საუკუნეზე მეტს ითვლის: პირველი ველო კლუბები XIX საუკუნის ბოლოს შეიქმნა, ხოლო დღეს ქვეყანაში 25,000 კმ-ზე მეტი მარკირებული ველო მარშრუტია.

ველოსიპედით სეირნობისას მნიშვნელოვანია უსაფრთხოებაზე ზრუნვა. 18 წლამდე მოზარდებისთვის ჩაფხუტის ტარება სავალდებულოა, თუმცა რეკომენდებულია ყველა ველოსიპედისტისთვის. პოლონეთში მოძრაობა არის მარჯვენა მხარეს, ამიტომ შეინარჩუნეთ ეს წესი გზაზე. ღამით აუცილებელია ველოსიპედზე წინა და უკანა განათების ჩართვა, ხოლო ხელით მიუთითეთ მიმართულება შეხვევამდე. ქვეითთა ზონებში იყავით განსაკუთრებით ფრთხილად — ზოგან შესაძლოა ველოსიპედიდან ჩამოსვლა დაგჭირდეთ.

სასარგებლო რესურსები:
ოფიციალური City Bike აპლიკაცია: Nextbike (iOS/Android)
მარშრუტების დაგეგმვა: komoot.com, strava.com
ველობილიკების რუკა ვროცლავში: gis.um.wroc.pl

ვროცლავი იდეალური ადგილია მათთვის, ვისაც სურს გადაადგილება, თავგადასავალი და ქალაქის სული ერთდროულად შეიგრძნოს. დაჯექით ველოსიპედზე და აღმოაჩინეთ ვროცლავი ახალი თვალით — იმ რიტმით, რომლითაც ქალაქი სუნთქავს.
უსაფრთხო და სასიამოვნო მგზავრობას გისურვებთ!

ავტორი: ანა როგავა

Ana Rogava