ბოლო წლებში პოლონეთი ოჯახთან ერთად ემიგრანტებისთვის ერთ-ერთ მთავარ მიმართულებად იქცა, რომლებიც საზღვარგარეთ უკეთესი ცხოვრების პირობების ძიებაში გადადიან. ოჯახებისთვის განსაკუთრებით მნიშვნელოვანია სოციალური დახმარებები, რადგან ისინი ბავშვების აღზრდასთან და ყოველდღიურ ხარჯებთან დაკავშირებულ ტვირთს ამცირებენ. ამ პროგრამებს შორის ყველაზე პოპულარულია „800+“, რომელიც სახელმწიფოსგან თითოეულ ბავშვზე ყოველთვიურად 800 ზლოტის ოდენობის დახმარებას ითვალისწინებს.
2025 წლის სექტემბერში მიღებულმა ცვლილებებმა მნიშვნელოვნად შეცვალა ის პირობები, თუ როგორ შეუძლიათ უცხოელებს ამ დახმარების მიღება. ახლა დახმარების მიღება მშობლის დასაქმებაზე, შემოსავლის დონესა და სხვა კრიტერიუმებზეა დამოკიდებული. სწორედ ამიტომ, სასიცოცხლოდ მნიშვნელოვანია, ემიგრანტებმა იცოდნენ, რა უნდა გააკეთონ, რათა არ დაკარგონ ეს უფლება და როგორ მოამზადონ დოკუმენტები.
ამ გზამკვლევში დეტალურად განვიხილავთ, რას ნიშნავს 800+, რა ახალი წესები დაწესდა და რა ნაბიჯები უნდა გადადგას ემიგრანტმა მშობელმა ამ დახმარების წარმატებით მისაღებად.
რა არის 800+?
800+ (პოლ. świadczenie wychowawcze) არის სახელმწიფო სოციალური დახმარება თითოეულ ბავშვზე, რომლის ყოველთვიური ოდენობა 800 პოლონური ზლოტია. 2025 წლის ცვლილებების თანახმად, უცხო ქვეყნის მოქალაქეებისთვის ამ დახმარების მიღება კონკრეტული პირობების შესრულებაზეა დამოკიდებული.
800+-ის მიღების ძირითადი წინაპირობები:
- ლეგალური სტატუსი – თქვენ უნდა გქონდეთ ლეგალური ბინადრობის ნებართვა ან შესაბამისი ვიზა.
- PESEL – მშობელსა და ბავშვს უნდა ჰქონდეთ მინიჭებული პოლონური საიდენტიფიკაციო ნომერი (PESEL).
- ბავშვის განათლება – ბავშვი უნდა იყოს დარეგისტრირებული და სწავლობდეს პოლონეთის საგანმანათლებლო სისტემაში.
- ოფიციალური დასაქმება – მინიმუმ ერთ-ერთი მშობელი უნდა იყოს ოფიციალურად დასაქმებული და მისი დამსაქმებელი ZUS-ში (სოციალური დაზღვევის ინსტიტუტი) რეგულარულად იხდიდეს შენატანებს.
- მინიმალური შემოსავალი – თქვენი შემოსავალი უნდა შეადგენდეს მინიმუმ პოლონეთის მინიმალური ხელფასის 50%-ს.
ნაბიჯ-ნაბიჯ ინსტრუქცია:
სოციალური დახმარების წარმატებით მისაღებად, ემიგრანტმა მშობელმა რამდენიმე ძირითადი ნაბიჯი უნდა გადადგას.
1. ლეგალური ყოფნის სტატუსის დადასტურება
პირველ რიგში, დარწმუნდით, რომ თქვენ და თქვენს ოჯახს გაქვთ პოლონეთში ყოფნის ლეგალური საფუძველი, იქნება ეს შესაბამისი ვიზა, ბინადრობის დროებითი ან მუდმივი ნებართვა. ასევე, აუცილებელია თან იქონიოთ თქვენი ძირითადი დოკუმენტები, როგორიცაა პასპორტი და საცხოვრებელი ადგილის დამადასტურებელი საბუთები (მაგალითად, ქირავნობის ხელშეკრულება).
2. მისამართის რეგისტრაცია (zameldowanie) და PESEL-ის მიღება
800+-ის განაცხადისთვის, როგორც მშობელს, ისე ბავშვს აუცილებლად უნდა ჰქონდეთ PESEL ნომერი. მის მისაღებად, მიმართეთ მუნიციპალურ ოფისს (Urząd Miasta ან Urząd Gminy).
საჭირო დოკუმენტები:
- პასპორტის ორიგინალი და ასლები;
- საცხოვრებელი ადგილის დამადასტურებელი საბუთი (ქირავნობის ხელშეკრულება ან სხვა);
- ბავშვის დაბადების მოწმობა (ორიგინალი და, ხშირ შემთხვევაში, ოფიციალური პოლონური თარგმანი).
თუ დოკუმენტაციასთან დაკავშირებით შეკითხვები გაქვთ, უმჯობესია დაუკავშირდეთ ადგილობრივ მუნიციპალიტეტს, რათა დააზუსტოთ ყველა დეტალი.
3. ბავშვის ჩართვა პოლონეთის განათლების სისტემაში
800+-ის მისაღებად, ბავშვი უნდა იყოს დარეგისტრირებული და დადიოდეს პოლონურ სკოლაში/ბაღში .
საჭირო დოკუმენტები:
- ბავშვის PESEL ნომერი;
- წინა განათლების შესახებ დოკუმენტები (ასეთის არსებობის შემთხვევაში);
- სამედიცინო ჩანაწერები.
მიმართეთ ადგილობრივ მუნიციპალიტეტს (Wydział Edukacji) ან სკოლის ადმინისტრაციას, რათა მიიღოთ შესაბამისი ცნობა ბავშვის სკოლაში რეგისტრაციის შესახებ, რომელიც მოგვიანებით 800+-ის განაცხადში დაგჭირდებათ.
4. ოფიციალური დასაქმება და შემოსავლის დადასტურება
ახალი რეგულაციებით, დახმარების მიღების მთავარი პირობა ერთ-ერთი მშობლის ოფიციალური დასაქმებაა.
- სამუშაო ხელშეკრულება – უმჯობესია გქონდეთ სამუშაო ხელშეკრულება (umowa o pracę), რომელშიც მითითებულია თქვენი ხელფასი და სამუშაო საათები.
- ZUS-ში შენატანები – დამსაქმებელი ვალდებულია დაგარეგისტრიროთ ZUS-ში და რეგულარულად გადაიხადოს თქვენი სოციალური და ჯანმრთელობის დაზღვევის შენატანები.
აუცილებლად შეინახეთ:
- ხელშეკრულების ასლი;
- ბოლო 3-6 თვის ხელფასის ქვითრები (paski wypłat);
- დამსაქმებლის მიერ გაცემული ცნობა ZUS-ში რეგისტრაციისა და შენატანების შესახებ.
შემოსავლის მინიმუმი:
თქვენი საშუალო თვიური შემოსავალი უნდა იყოს პოლონეთის მინიმალური ხელფასის მინიმუმ 50%. 2025 წლის კონტექსტში ეს დაახლოებით 2333 პოლონურ ზლოტს შეადგენს (ბრუტო). ეს თანხა ZUS-ის მიერ რეგულარულად მოწმდება.
როგორ იმოქმედებს Umowa zlecenie 800+–ზე
თუ umowa zlecenie-ზე სრულად იხდიან ZUS-ის შენატანებს (სოციალურ და ჯანმრთელობის), და შემოსავალი უდრის მინიმუმ 50% მინიმალური ხელფასის (2025-ში ~2333 PLN ბრუტო),მაშინ შეგიძლიათ მიიღოთ 800+ – რადგან ფორმალურად პირობა შესრულებულია.
მაგრამ!თუ ხელშეკრულება zlecenie-ზე მხოლოდ ნაწილობრივია დაზღვეული (არ იხდიან სრულ სოციალურ შენატანებს), შესაძლოა ZUS არ ჩათვალოს ეს საკმარის დასტურად. ასეთ დროს დახმარება შეიძლება უარყონ.
პრაქტიკული რჩევა
აუცილებლად მოითხოვეთ დამსაქმებლისგან Zaświadczenie o odprowadzanych składkach ZUS (ცნობა გადახდილ შენატანებზე).გადაამოწმეთ თქვენს პირად PUE ZUS ანგარიშზე, ნამდვილად ირიცხება თუ არა შენატანები ყოველთვე.თუ გაქვთ umowa zlecenie, და ჯამში შემოსავალი აღემატება მინიმუმ 2333 PLN bruto და ყველგან იხდიან შენატანებს → ესეც ჩაითვლება.
5. განაცხადის წარდგენა
განაცხადი 800+-ზე წარედგინება ZUS-ს. ეს შეგიძლიათ გააკეთოთ რამდენიმე გზით:
- ელექტრონულად – ZUS-ის ელექტრონული პლატფორმის (PUE ZUS) გამოყენებით, თუ გაქვთ პირადი ანგარიში.
- პირადად ან ფოსტით – ZUS-ის შესაბამის განყოფილებაში.
განაცხადში საჭიროა:
- მშობლისა და ბავშვის PESEL ნომრები;
- ბავშვის სკოლის დამადასტურებელი საბუთი (potwierdzenie uczęszczania do szkoły);
- სამუშაო ხელშეკრულება და ხელფასის ქვითრები/ZUS-ის ცნობა;
- პირადობის მოწმობის/პასპორტის ასლები;
- საბანკო ანგარიშის ნომერი (IBAN).
პრაქტიკული რჩევები და დოკუმენტების ჩამონათვალი
დოკუმენტების შემაჯამებელი ჩამონათვალი:
მშობლისთვის:
- პასპორტი (ორიგინალი + ასლები);
- საცხოვრებელი ადგილის დამადასტურებელი დოკუმენტი;
- PESEL ნომერი;
- სამუშაო ხელშეკრულება (umowa o pracę) და ბოლო 3-6 თვის ხელფასის ქვითრები;
- საბანკო ანგარიშის ნომერი (IBAN).
ბავშვისთვის:
- დაბადების მოწმობა (ორიგინალი + ოფიციალური პოლონური თარგმანი);
- PESEL ნომერი;
- სკოლის რეგისტრაციის დამადასტურებელი დოკუმენტი;
- საჭიროების შემთხვევაში – შეზღუდული შესაძლებლობის დამადასტურებელი დოკუმენტი.
პრაქტიკული რჩევები:
- შეინახეთ ყველა დოკუმენტი – განსაკუთრებით ხელფასის ქვითრები და ხელშეკრულებები.
- ოფიციალური თარგმანი – მნიშვნელოვანი დოკუმენტები, მაგალითად ბავშვის დაბადების მოწმობა, თარგმნეთ ოფიციალური მთარგმნელის (tłumacz przysięgły) მეშვეობით.
- გამონაკლისები – გაითვალისწინეთ, რომ ბავშვებზე, რომლებსაც აქვთ შეზღუდული შესაძლებლობები, ან ბავშვებზე, რომლებიც მეურვეობის ქვეშ იმყოფებიან, შესაძლოა დასაქმების მოთხოვნა არ გავრცელდეს.
- კონსულტაცია – თუ განაცხადზე უარს გეტყვიან ან დამატებით დოკუმენტებს მოგთხოვენ, მიმართეთ სოციალური დახმარების ადგილობრივ ოფისს (MOPS/MCPS) ან იურიდიულ დახმარებას.
ხშირად დასმული კითხვები
კითხვა: აუცილებელია თუ არა პოლონური ბანკის ანგარიში, რომ მივიღო 800+?
პასუხი: პრაქტიკულად, თანხა პოლონურ ანგარიშზე ირიცხება. თუ არ გაქვთ, უმჯობესია გახსნათ, რადგან ბანკები ხშირად PESEL-სა და მისამართს ითხოვენ.
კითხვა: შეუძლიათ თუ არა დახმარების მიღება სეზონურად ან არაოფიციალურად დასაქმებულებს?
პასუხი: ახალი რეგულაციით, აუცილებელია ოფიციალური შენატანები ZUS-ში. არაოფიციალური სამუშაო ამ მოთხოვნას ვერ აკმაყოფილებს.
კითხვა: რა ვქნა, თუ სამსახურს დავკარგავ?
პასუხი: აუცილებელია ამის შესახებ დაუყოვნებლივ აცნობოთ ZUS-ს. შესაძლოა, ამ შემთხვევაში დახმარების მიღება შეწყდეს ან შეიზღუდოს.
სასარგებლო ფრაზები პოლონურად
- Chciałbym/Chciałabym złożyć wniosek o świadczenie wychowawcze 800+. – მსურს 800+-ის განაცხადი შევიტანო.
- Gdzie mogę złożyć dokumenty dotyczące PESEL dla dziecka? – სად შემიძლია ბავშვის PESEL-ის დოკუმენტები შევიტანო?
- Potrzebuję zaświadczenia z zakładu pracy o odprowadzanych składkach ZUS. – მჭირდება დამსაქმებლის ცნობა ZUS-ში გადახდილი შენატანების შესახებ.
დასკვნითი რეკომენდაციები
იყავით კონტაქტზე ZUS-თან და მუნიციპალიტეტთან, რადგან სწორედ ისინი არიან ის ინსტიტუტები, რომლებიც საბოლოო გადაწყვეტილებას იღებენ.
მოაგროვეთ და შეინახეთ ყველა დოკუმენტი (ხელშეკრულებები, ხელფასის ქვითრები, ცნობები).
მიიღეთ PESEL მშობლისთვის და ბავშვისთვის რაც შეიძლება სწრაფად და დაარეგისტრირეთ ბავშვი სკოლაში.
მუდმივად აკონტროლეთ თქვენი შემოსავლის შესაბამისობა და დაუკავშირდით დამსაქმებელს ZUS-ში რეგისტრაციის შესახებ.
ავტორი: ნათია ქიმაძე
